У мінулым месяцы піянерскаму атраду 4 класа дружыны імя Якуба Коласа СШ №2 г. Міёры было прысвоена імя былога вучня школы, лейтэнанта міліцыі Аляксандра Кісялеўскага.

У Міёрскім РАУС ён служыў на пасадзе ўчастковага інспектара міліцыі аховы правапарадку і прафілактыкі. Агульны міліцэйскі стаж невялікі - два гады. Яму не ўдалося здзейсніць многія задумы і планы, бо зусім маладым загінуў пры выкананні службовага абавязку. Пасмяротна ўзнагароджаны ордэнам "За асабістую мужнасць".

Піянерскі атрад Міёрскай СШ №2 першы ў Беларусі, якому прысвоена імя супрацоўніка міліцыі, і ўрачыстая цырымонія з гэтай нагоды праходзіла ў асаблівай абстаноўцы ў Цэнтральным музеі МУС Беларусі. У ёй прынялі ўдзел намеснік начальніка галоўнага ўпраўлення кадраў МУС Васіль Сакавец, старшыня Цэнтральнага Савета грамадскага аб'яднання "Беларуская рэспубліканская піянерская арганізацыя" Наталля Кураш, старшы інспектар Цэнтра культурнага выхавання МУС Віялета Салодкая і бацька загінуўшага міліцыянера Славамір Кісялеўскі.

У гэты дзень на сцязе школьнай піянерскай дружыны з'явілася асаблівая адзнака - імянная стужка героя, а лепшым піянерам — Ірыне Драба і Уладзіміру Катовічу — завязалі гальштукі "лідара".

Пасля ўрачыстасці дзеці ўсклалі кветкі да помніка супрацоўнікам органаў унутраных спраў і ваеннаслужачым унутраных войск МУС, якія загінулі пры выкананні службовага і воінскага абавязку. Запамінальнымі былі экскурсіі па музеі МУС, па Мінску і мемарыяльных комплексах "Хатынь", "Шунеўка". Раённы Савет ГА "БРПА" дзякуе супрацоўнікам і кіраўніцтву Міёрскага РАУС за дапамогу ў арганізацыі паездкі.